Мамлекеттик тил боюнча улуттук комиссия: "Латын арибине өтүү планда жок"

Мамлекеттик тил боюнча улуттук комиссиянын төрагасы Назаркул Ишекеев Кыргыз өлкөсүндө латын арибине өтүү боюнча планда жок экенин айтты. Бул тууралуу ал бүгүн, 13-сентябрда парламенттин жыйынында депутат Жанар Акаевдин суроосуна жооп берип жатып билдирди.

Анын айтымында, латын арибине өтүү маселеси чоң көлөмдөгү акча каражатка муктаж болгондуктан күн тартипте жок.

Мындан тышкары Жанар Акаев Шайлообек Дүйшеевдин элге сиңимдүү, уккулуктуу берүүлөрү бар экенин белгилеп, аны жалпы мамлекеттик телеканалдардан көрсөтсө жакшы болмок деген сунушун айтты.

Айта кетсек, быйыл 20-июлда президент Алмазбек Атамбаев “Алтай цивилизациясы жана алтай тектүү элдери” эл аралык форумунда Кытай, Япония латын арибине өтпөй эле өнүгүп жатканын айткан. Мамлекет башчы "латын арибине өтүү экономикага пайда алып келет" деген пикир туура эмес экенин билдирген.