Аида Салянованын сотунда прокурорлор менен жактоочулар айтышып кетти

Бүгүн, 13-сентябрда Жогорку Кеңештеги оппозициялык "Ата Мекен" фракциясынан депутат Аида Салянованын үстүнөн козголгон кылмыш иши боюнча соттук отурум уланууда. Прокурор жактоочу Чынара Жакупбекова тарабынан атайын соттук ишти кечиктирүүгө аракет жасалып жатканын айтты.

"Жактоочу ишти атайын кечиктирүүгө аракет кылууда. Эртең менен "Элдик парламенттин" соту калтырылды. Жактоочу ал жерге барган эмес. Натыйжада бул жактагы отурум да үзгүлтүккө учурады", - деди мамлекеттик айыптоочу.

Ал эми жактоочу Чынара Жакупбекова кечээ, 12-сентябрда Өмүрбек Текебаевдин сотунда жүргөн учурда шаардык сотто бүгүн, 13-сентябрда "Элдик парламенттин" өкүлдөрүнүн соту болору айтылганын, ошондуктан бүгүн эртең менен соттук отурумга келбей калганын айтты.

"Мен кечээ "Элдик парламенттин" сотуна кеч чакыруу алдым. Бүгүн саат 9:00дө чалып, Салянованын сотуна байланыштуу, шаардык соттогу отурум башка күнгө калтырылганын айтты, ал учурда Ленин райондук соту отурумду түштөн кийинкиге калтыргандыктан отурумга келе алган жокмун", - деди жактоочу Жакупбекова.

Андан ары жактоочу менен прокурорлор айтыша кетти.