Жактоочу: "Салянова башкы прокурор болуп турганда кызматтан айдалган прокурордун ага жеке таарынычы болушу мүмкүн"

Бүгүн, 13-сентябрда Жогорку Кеңештеги оппозициялык "Ата Мекен" фракциясынан депутат Аида Салянованын үстүнөн козголгон кылмыш иши боюнча соттук отурум уланууда. Отурумда коомдук жактоочу соттогу прокурор Марат Бусурманкулов Аида Салянова башкы прокурор болуп турган учурда кызматтан кеткенин эскертип, Бусурманкуловду соттук отурумдан четтетүүнү сурады.

"Бул жердеги айыптоочу Бусурманкулов 2013-жылы Аида Салянова башкы прокурор болуп турган учурда кызматтан кеткен. Ал бул иште прокурор болуп отурушу туура эмес. Бул иште прокурордун жеке кызыкчылыгы же таарынычы болушу мүмкүн. Ошондуктан прокурор Бусурманкуловду отурумдан четтетүүнү өтүнүч кылам", - деди коомдук жактоочу.

Сот тараптардын пикирин угуп, өтүнүчтү четке какты.

Эскерте кетсек, 2016-жылдын декабрь айында Саляновага "кызматтык абалынан кыянаттык менен пайдалануу" беренеси боюнча кылмыш иши козголгон. Ал "Юстиция министри болуп турганда кылмыш жасаганы үчүн издөөдө жүргөн Алексей Елисеевдин адвокаттык лицензиясын узарткан" деп айыпталууда.