Султан Раевдин "Кара" романы Москвада "Евразия сыйлыгына" татыды

Жазуучу, драматург жана мамлекеттик ишмер Султан Раевдин "Кара" романы Евразия чыгармачыл уюму тарабынан Москва шаарында өткөн "Евразия сыйлыгы" V эл аралык сыйлык тапшыруу аземинде алтын медаль жана лауреаттык наам менен сыйланды. Анын жазуучулук жана котормочулук боюнча "Адабий Евразия" эл аралык форумуна катышкандыгы тууралуу "Кыргыздын жаңы адабияты" расмий сайтында жарыяланды.

Маалыматта жазылгандай, сыйлык жыл сайын билим, искусство жана адабият боюнча 3 номинация менен берилет. Жеңүүчүлөргө алтын статуэтка, медаль жана сертификат тапшырылат.

Бул жылы эл аралык калыстар тобу Кыргыз мамлекетинин, Орусия, Англия, Индия, Непал, Украина, Азербайжан жана Казакстандын адабият жана маданият кызматкерлерин мыкты деп тапкан.

Адабият боюнча Султан Раевдин 2005-жылы Лондондо чыгарылган "Кара" аталышындагы китеби сыйлыкка татыктуу деп табылган. 2013-жылы аталган роман Кыргыз өлкөсүндө "Жылдын эң мыкты романы" деп аталган. Романдын кыргыз тилиндеги аталышы "Жанжаза".

Чыгарма бир нече чет тилдерине которулуп, Кембридж жана Лондон университеттеринде бет ачар аземдери өткөн. Бул жылы ал Сеулда корей жана Анкарада түрк тилинде басылып чыгат.