Бишкек мэриясы 1-июнь- Бүткүл дүйнөлүк балдарды коргоо күнүн белгилөөгө 1 миллион 60 миң сом бөлдү

Бишкек шаардык мэриясы 1-июнда саат 10:00дө Т.Сатылганов атындагы Улуттук филармонияда социалдык колдоого муктаж, көп балалуу үй-бүлөлөрдүн балдарынын, окуунун мыктыларынын жана кароо-сынактардын, олимпиада жеңүүчүлөрүнүн катышуусунда салтанаттуу иш-чара өткөрөт. 1-июнь - Бүткүл дүйнөлүк балдарды коргоо күнүнө карата уюштурулап жаткан бул иш-чарага 1200 адам катышмакчы.

Аталган майрамды өткөрүүгө мэриясы 1 миллион 60 миң сом бөлдү. Концертке: Балдардын чыгармачылык борборлору, “Ак шоола” хор ансамбли жана балдардын “Таберик” музыкалык театры катышат. Филармониянын фоэсинде балдар чыгармачылыгынын көргөзмөсү уюштурулат.

Иш-чаранын соңунда 1200 балага балдар жана кыздар үчүн энциклопедия, таттуу белектер, бал муздак тапшырылат.

Мындан тышкары 1-июнь күнү шаардын райондук администрациялары майрамдык иш-чараларды уюштурушат. Иш-чаралар – Ата-Түрк, Панфилов, Фучик, Каражыгач, Асанбай кичи районундагы сейил бактарда өткөрүлөт.

Биринчи Май райондук администрациясы Панфилов сейил багында саат 10:00дөн 15:00гө чейин майрамдык концерт, балдар чыгармачылыгынын көргөзмөсүн, асфальтка сүрөт тартуу кароо-сынактарын жана башка иш-чараларды өткөрөт.

Ата-Түрк сейил багында саат 10:00дөн 14:00гө чейин “Кыргызстан балдары” балдар чыгармачылыгынын шаардык борбору майрамдык концерт, оюн аттракциондорун, асфальтка сүрөт тартуу, көркөм окуу кароосун жана башка оюн-зоокторду өткөрөт.

Каражыгач багында саат 10:00дөн 13:00гө чейин балдар чыгармачылыгынын Свердлов райондук борбору майрамдык концерт, балдар буюмдарынын жарманкесин, сүрөт тартуу кароо-сынагын, шахмат оюну боюнча мелдештерди өткөрөт.

Асанбай кичи районундагы сейил бакта Октябрь райондук балдар чыгармачылык борбору тарабынан майрамдык иш-чаралар уюштурулат. Иш-чараларга активдүү катышкан жана кароо, мелдештердин жеңүүчүлөрү баалуу сыйлыктар менен сыйланат.