Ырчы Асел Кадырбекова: "Банкрот болгон жокмун, бизнесте өзүмө тажрыйба алдым"

SUPER.KG порталынын "Элдик видео" бөлүмүнө "Асел Кадырбекова банкрот болду, ал эми жеке жашоосу..." аталышындагы видео жүктөлгөн. Видеодо Аселдин мындан 6 ай мурун кийим саткан дүкөн ачып, банкрот болгондугуна байланыштуу андагы эмеректерин сатуу менен убара болуп жаткандыгы баяндалган.

Бул видеого ырчы бийкеч кымындай да терикпегендигин өзү биздин порталга айтып берди.

"Эртең менен ойгонсом интернет аркылуу 5 кишиден ушул видео келиптир. Көрүп алып күлкүм келди. Эми бир жумушу жок адамдын жасаганы болсо керек", - деди ал өзү жөнүндө даярдалган видеонун ага берген таасири туурасында.

Ырчынын айтымында, жаз айларында тааныш кыздарынын бири менен биргеликте бизнес жүргүзүү максатында дүкөн ачышкан. Бирок учурда алар ар кимиси өз алдынча иштөөнү туура көргөн.

"Бул жумуш бизге жакшы киреше алып келе баштаганда мага шерик болгон кыздын пикири өзгөрүлдү. Мындан улам биз чогуу иштешпейбиз деген чечимге келдик. Бөлүнгөндөн кийин дароо эле кайра дүкөн ачууга убактым да, даярдыгым да жок болгондуктан жабууга туура келди. Мен бул дүкөндү чоң киреше табам деп эмес, жеке ишкер катары тажрыйба алам деген ой менен ачкандыктан анчалык деле кейий турган эч нерсени сезген жокмун. Чынында аз да болсо көзүм ачылып, бизнес - оюн эмес экендигин, ал үчүн алдын ала түзүлгөн пландар, кимдир бирөө менен шерик болбоо керек экенин түшүндүм. Андыктан мени банкрот болду дегендик туура эмес, мен жеке ишкерчиликте тажрыйба гана алдым", - дейт Кадырбекова.

Видеодо анын Нурлан Насиптин туулган күнүндө куттуктабагандыгы айтылып, жеке жашоосунда да банкрот болгонбу деген суроо жолдонгон. Асел азырынча бул боюнча эч кандай комментарий бере албай тургандыгын кошумчалады.

"Жеке жашоо - бул менин жашоом, ал тууралуу сөз кылгым келбейт. Убагы келгенде баарын айтабыз", - деп билдирди ал.