Жер шарындагы эң кары адам катары эсептелинген ямайкалык Вайолет Моссе-Браун көз жумду

Жер шарындагы эң кары адам катары эсептелинген ямайкалык Вайолет Моссе-Браун аттуу кемпир 117 жашында көз жумду. Анын каза болгондугу тууралуу бүгүн, 16-сентябрда чет элдик маалымат булактары жазып чыгышкан.

Мындай маалыматты, Ямайканын премьер-министри Эндрю Холнесс өзүнүн интернеттеги социалдык баракчасына жазып, билдирүү калтырган.

"Кечээ Жер шарындагы эң кары адам катары эсептелинген Вайолет Моссе-Браун каза болду. Жаткан жери жайлуу болсун" деп жазган премьер-министр.

Браун 1900-жылы 10-мартта жарык дүйнөгө келген. Ал учурда Ямайка Улуу Британиянын курамында болуп, Вайолет Моссе-Браун туулгандыгы тууралуу күбөлүктү Британиядан алган. Ал эми Ямайка 1962-жылы гана Эгемендүүлүктү алып, өзүнчө өлкө аталган.

Ушул жылдын 17-апрелинде италиялык Эмма Морано каза болгон соң Жер шарындагы эң кары адам болуп Вайолет Моссе-Браун эсептелинип келген. Ал өмүр бою кант камышы өстүрүлгөн аянтта эмгектенген. Анын ырдоону сүйгөндүгү, ошондой эле чочко менен тооктун этин жебегендиги айтылат маалыматта.