48 күн мурун дааратканадан табылган ымыркай балдар үйүнө өткөрүлүп берилди

31-июль күнү Бишкектин Арча-Бешик конушундагы үйлөрдүн бириндеги дааратканадан табылган ымыркайдын энеси табылбай ал балдар үйүнө өткөрүлүп берилди. Бул тууралуу SUPER.KG'ге Эмгек жана социалдык өнүгүү министрлигинин маалымат кызматынан билдиришти.

"Ымыркайга №3-балдар ооруканасынын дарыгерлери тарабынан Даткайым деген ат берилген. Ал учурда балдар үйүндө тарбияланып жатат. 48 күндүк болду. Абалы жакшы", - деп билдиришти министрликтин маалымат кызматынан.

Эске салсак, Арча-Бешик конушундагы үйлөрдүн бириндеги дааратканадан ымыркайдын ыйлаганы угулган. Үйдүн ээси жаңы төрөлгөн кызды ал жерден алып чыгып, "Тез жардам" кызматына өткөрүп берген. Наристе Бишкектеги №3-балдар ооруканасынын жандандыруу бөлүмүндө жаткандыгы, анын абалы оор экендиги кабарланган. Окуя боюнча кылмыш иши козголуп, ымыркайдын энеси издөөгө алынган.