Румыниядагы бороон 10го чукул адамдын өмүрүн алды. Саатына 100 чакырымга жеткен мындай бороон Украинага жетиши күтүлүүдө

Румынияда ылдамдыгы саатына 100 чакырымга жеткен бороон катталып, мындан өлкөнүн батыш тарабындагы Тимишоара шаары зыянга учурады. Чет элдик ЖМКлардын маалыматына таянсак, анын кесепетинен 8 адам каза болуп, 70 адам ооруканаларга жеткирилди.

Катуу бороон дарактарды сындырып, үйлөрдүн чатырларын учуруп кеткен. Ошондой эле бир канча электр чубалгылар, суу түтүктөр жараксыз абалга келген.

Аталган шаардын мэри Николае Робу жергиликтүү "Digi 24" телеканалына берген интервьюсунда мындай аба ырайы күтүлөрүн эч ким эскертпегенин айтты. "Бизде мындай аба ырайы күтүлүп жатканын эч ким эскерткен эмес, жамгыр жаашы тууралуу гана маалымдалган", - деди Робу.

Өлкөнүн куткаруу кызматтары жашоочуларды көчөгө чыкпай турууга чакырууда. Ал эми синоптиктер бороон учурда Украина тарапка жылып жатканын айтышууда.