Эдил Байсалов "Liglass" боюнча депутаттык комиссия түзүүнү сунуштады

Бишкекте бүгүн, 18-сентябрда активист Эдил Байсалов маалымат жыйын берүүдө. Тема - Кыргызга ГЭС курарын билдирген "Liglass" компаниясынын тегерегиндеги кырдаал.

Байсалов "Liglass" деген шылуун компанияны өлкөгө алып келгени үчүн президенттик аппараттын башчысы Сапар Исаков, мурдагы премьер-министр Сооронбай Жээнбековдун саясий жоопкерчилигин кароо зарылдыгын айтат.

"Бул иште негизги жоопкерчилик Кыргыз тарапта. Жооптуу кызматкерлерибиз менен жетекчилерибиздин жоопкерчилигин сөзсүз талап кылышыбыз керек. Дүйшөнбек Зилалиев бул иште эч ким эмес. Шылуундарды Кыргыздын төрүнө чыгаруу анын колунан келмек эмес. "Liglass" компаниясын өлкөгө Зилалиев алып келип, президенттерге кол койдурган жок да", - дейт Байсалов.

Бул окуяны Жогорку Кеңештин депутаттык комиссиясы иликтеши керектигин кошумчалады.

Эртең, 19-сентябрда "Liglass" компаниясы убада кылган 37 миллион долларды Кыргызга которуу мөөнөтү бүтөт. Бишкекте бүгүн аталган компаниянын жетекчилиги маалымат жыйын берип, Кыргыз өкмөтү менен сүйлөшүүгө келгенин айтышты. Бирок 37 миллион доллар качан которуларын айта алышкан жок.