Депутат Алмамбет Шыкмаматовдун соту мамлекеттик айыптоочулар камсыздаган күбөлөр келбегендиктен башка күнгө жылды

“Ата Мекен” фракциясынан депутат Алмамбет Шыкмаматовдун соту 25-сентябрга саат 14:00гө жылдырылды. Мамлекеттик айыптоочу өздөрү камсыздаган күбөлөрдүн келбегенине байланыштуу сот жылдырылганын айтты.

УКМК Шыкмаматов жеке кызыкчылыгын көздөп, аялынын Мерседес Бенц Е320 үлгүсүндөгү унаасын кымбат баага сатуу үчүн "Барат Люкс" ишканасын тендерге катышкандардын катарына кошууну демилгелеген деп жатат. Шыкмаматов муну "саясий кысым" деп келет. Эскерте кетсек, аталган тендерге 2 фирма катышып, 2011-жылы 5-октябрда жыйынтыкталган.

Эскерте кетсек, аталган соттук отурумдун төрагасы Айбек Эрнис уулу буга чейин эмгек өргүүсүндө болгондугуна байланыштуу отурум ал жумушка чыккандан кийин уланмак. Жалпыга маалым болгондой, ал Өмүрбек Текебаев менен Дүйшөнкул Чотоновдун дагы соттук процессинин 1-инстанциясына төрагалык кылып, соттолуучуларга өз чечимин чыгарган. Мындан соң Эрнис уулу эмгек өргүүсүнө чыккан.