Текебаев менен Чотоновдун соту: Сотто Алексей Модиндин 2010-жылы кимдин кабинетине киргени белгилүү болду

Бишкек шаардык сотунда депутат Өмүрбек Текебаев менен экс-министр Дүйшөнкул Чотоновдун иши боюнча соттук отурум уланууда. Соттук коллегиянын төрагасы Алексей Модиндин тергөөдөгү көрсөтмөсүн окуду. Модиндин көрсөтмөсүндө 2010-жылдын 13-майында орусиялык ишкер Леонид Маевский жана өзү кошулуп Текебаев менен анын өкмөт үйүндөгү кабинетинде (протоколдо учурда биринчи вице-премьер-министр отурган кабинет белгиленген) жолугушканы көрсөтүлгөн.

Текебаев учурда биринчи вице-премьер-министр отурган кабинетте президент Алмазбек Атамбаев Убактылуу өкмөттүн төрайымынын орун басары болуп турганда отурганын айтты. "Модин көрсөткөн 306-кабинетте Алмазбек Атамбаев отурган. А мен 307-кабинетте отургам. Модин мартта берген көрсөтмөсүн радикалдуу өзгөртүп жатат. Анда Атамбаевдин бөлмөсүнө кирип менин, өзүнүн, Өмүрбек Абдрахмановдун, Леонид Маевскийдин кайсы жерде отурганын айткан. Бирок кийин башка жерде жолугушканыбызды айтып чыкты", - деди Текебаев.