Текебаев менен Чотоновдун соту 21-сентябрда уланат. Отурумду жылдырууга соттун сасык тумоо оорусу жактоочуга жугуп калганы себеп болду

Бишкек шаардык сотто Өмүрбек Текебаев менен экс-министр Дүйшөнкул Чотоновдун кылмыш иши боюнча иш материалдардын 5-тому тергелүүдө.

Аталган томдо "Текебаевге бир миллион доллар бердим" деген орусиялык ишкер Маевскийдин тергөөдө берген көрсөтмөсү камтылган. Бирок Текебаев Маевский көрсөтмөсү 2017-жылдын март айында башка өңүттө берсе, кийин сотто башкача көрсөтмө бергенин айтып, "Маевский жанын жеген адам. Көрсөтмөлөрү бири-бирине дал келбейт" деп билдирди.

Ал ортодо соттук коллегиянын төрагасы Адис Момуналиев сасык тумоо болуп ооруп жаткандыктан Текебаевдин жактоочусу ишти бир жумага жылдырып турууну өтүндү.

"Ишти кароону бир жумага жылдырып турбайсызбы. Сиздин сасык тумооңуз мага жугуп калды, мен бала эмизем. Уланта берсеңиз баарыбызды сасык тумоо кыласыз", - деген өтүнүчүн келтирди жактоочу. Анын өтүнүчүнөн кийин сот Момуналиев ишти 21-сентябрда улантуу чечимин кабыл алды.