ФИФА жылдын мыкты футболчусу наамына ат салышып жаткан үч футболчунун атын жарыялады

Эл аралык футбол федерациясы (ФИФА) жылдын мыкты футболчусу наамына ат салышып жаткан үч футболчунун атын атады. ФИФАнын сайтына жарыяланган маалыматка караганда, үчтүккө "Реал" футбол клубунун чабуулчусу, португалиялык Криштиану Роналду, "Барселонанын" чабуулчусу аргентиналык Лионель Месси жана "ПСЖ" футбол клубунун чабуулчусу бразилиялык Неймар кирген.

Мыкты машыктыруучу наамына италиялык Массимиллиано Аллегри ("Ювентус", Италия), Антонио Конте ("Челси", Англия), жана Зинедин Зидан ("Реал", Испания) ат салышууда.

Ал эми мыкты дарбазачы наамына Жанлуижи Буффон ("Ювентус"), Кейлор Навас ("Реал"), Мануэль Нойердин ("Бавария") талапкерлиги коюлган.

Добуштардын 50 пайызы клубдук командалардын башкы машыктыруучуларынын жана команда капитанынын чечимине карата аныкталат. Ал эми калган 50 пайызы күйөрмандардын жана 200 журналисттен түзүлгөн атайын топтордун добушуна негизделет.

Айта кетсек, өткөн жылы ФИФАнын версиясы боюнча Криштиану Роналду мыкты футболчу аталып, ошону менен ал төртүнчү жолу аталган наамды алган. Ал эми Лионель Месси 5 жолу мыкты футболчу аталган.