Нуржан Шайлдабекова, БШКнын төрайымы: "Мени Атамбаев дайындаган эмес"

Бүгүн, 23-сентябрда "Таза шайлоо" кыймылынын Борбордук шайлоо комиссиясынын курамы менен жолугушуусу өтүүдө. Анда БШКнын төрайымы Нуржан Шайлдабекова ээлеген кызматына кантип келгенин айтып берди.

"Мени президент Алмазбек Атамбаев дайындаган эмес, шайлоо комиссиясы шайлаган. Мен мүчө катары, төрайым катары шайлангам. БШК кимдир бирөөнүн тапшырмаларын аткарган жок. Биз мыйзамдын негизинде иштеп жатабыз. Өкмөт материалдык-техникалык жактан жардам берүүдө. БШКда президенттин, парламенттик фракциялардын өкүлдөрү бар. Кесиптештеримди көз карандысыз болууга чакырар элем. Эч кимди күнөөлөгүм келбейт, бирок коллегиалдык чечимди сыйлоого чакырам", - деди Шайлдабекова.

Айта кетсек, "Таза шайлоо" кыймылына экс-президент Роза Отунбаева, экс-депутаттар Феликс Кулов, Равшан Жээнбеков, юрист Рита Карасартова, коомдук ишмерлер Абдыганы Эркебаев, Динара Ошурахунова жана башкалар кирет.