Жабык имараттагы Азия оюндары: Бекназар Раимкул уулу Кыргыздын пайдасына 7-алтын медалды алып келди

Түркмөнстандын Ашхабад шаарында 17-27-сентябрь аралыгында өтүп жаткан уруш түрлөрү боюнча жабык имараттагы V Азия оюндарында Кыргыз самбочусу Бекназар Раимкул уулу алтын медалды жеңип алды.

Бекназар Раимкул уулу 74 килограммга чейинки салмак ченинде күрөшүп, алгачкы беттеште индонезиялык Жефри Топанды 8:0 эсебинде жеңип, жарым финалда түркмөнстандык Сатлык Карыевди да жеңген. Финалда Раимкул уулу казакстандык Ассылбек Смаилов менен күч сынашып 13:6 эсебинде аны дагы жеңип алды.

Ал эми Данияр Алымжанов 100 килограммга чейинки салмак ченинде катышып, чейрек финалда монголиялык балбанды жеңип, жарым финалда түркмөнстандык Бабажан Иввадулаевди утуп финалга өткөн. Финалда Кыргыз спортчу түркмөнстандык Карымурат Аннатурбановго туш келген. Беттештин жыйынтыгында түркмөн самбочу жеңишке жетип Данияр Алымжанов күмүш медалын тагынган.

Жана ошондой эле 100 килограммга чейинки салмак ченинде Улукбек Мамытов жана 74 килограммга чейинки салмак ченинде Салмоорбек Маматемин уулу коло медалдарын тагынган.

Бул жыйынтык менен Кыргыз өлкөсү 48 медалга ээ. Алардын ичинде 7 алтын, 15 күмүш жана 26 коло медаль. Жалпы медалдык эсепте Кыргыз өлкөсү 11-орунда жайгашты.