Жээнбековго жана Бабановго үгүттөгөн диний ишмерлер жоопкерчиликке тартылышы мүмкүн

Бүгүн, 26-сентябрда Бишкекте шайлоонун өтүшүндөгү коопсуздук маселеси боюнча талкуу болду. Анын жүрүшүндө Борбордук шайлоо комиссиясынын өкүлү Кайрат Осмоналиев үгүт иштерине аралашып кеткен дин ишмерлерине жана мурдагы муфтийлерге чара көрүлүшү керек экенин айтты.

"Мурдагы муфтийлердин үгүт иштерине катышкандыгы боюнча жеке оюмду айтайын. Ушул оюмду мен БШКнын отурумунда сунуш катары да алып чыгам. Чубак Жалилов жана Садыкжан Камаловдун административдик жоопкерчиликтерин караш керек жана башка талапкерлерге да үлгү болушу керек. Мындай көрүнүш коркунучтуу прецедент болуп жатат. Ошондуктан эки талапкерге тең эскертүү беришибиз керек. Бүгүн-эртең маселе каралат", - деди Кайрат Осмоналиев.

Ал эми "Таза шайлоо үчүн" кыймылынын өкүлү Эмилбек Каптагаев шайлоо иштерине дин өкүлдөрүнүн кийлигишине бөгөт коюу маселесин бардык дин ишмерлерге чейин жеткирүү шарт экенин айтты.

"Экөө гана эмес, бүгүнкү күндө Башкы прокуратура тарабынан муфтийдин өзүнө ар бир мечиттин имамдарына эскертүү берилиши керек. Силер дин өкүлдөрү катары шайлоого карата үгүт иштерине кийлигишпешиңер керек деген кат жүзүндө эскертүүлөр жиберилиши керек", - деди Эмилбек Каптагаев.

Айта кетсек, экс-муфтий Чубак Жалилов Жалал-Абадда талапкер Сооронбай Жээнбековдун эл менен жолугушуусуна катышып, чогулгандарды аталган талапкерди колдоого үндөгөн. Ал эми диний ишмер Садыкжан Камалов Ош облусунда талапкер Өмүрбек Бабановдун эл менен жолугушуусунда аны колдоп сүйлөгөн.