Баткен: Кадамжайда элдин үрөйүн учуруп жаткан адам дале кармала элек

Баткен облусуна караштуу Кадамжай районундагы Кичи-Айдаркен айылында элдин үрөйүн учуруп жаткан адам кармала элек. Бул тууралуу Баткен облустук ички иштер башкармалыгынын басма сөз катчысы Дамира Юсупова 26-сентябрда SUPER.KG'ге билдирди.

Анын ким экендиги аныкталып, 19-сентябрдан бери милиция кызматкерлери, айыл тургундары жана жакындары айылга жакын жерлерден издеп жатышат. Ал Баткен районундагы Таян деген айылдын 1972-жылы туулган Абдималик Сабиров аттуу тургуну. Сабиров психикалык жактан жабыркагандыктан 2017-жылдын 14-июлунда үйүнөн чыгып кеткен бойдон дайынсыз болуп изделип жаткан.

Маалым болгондой, ал 9-сентябрда Кичи-Айдаркен айылына келип саат 22:15 чамасында бир аялды себепсиз уруп качып кеткен. 10-сентябрда да аталган айылдагы үйлөрдүн бирине кирип келип, ошол үйдө жашаган аялды муунтууга аракет кылган. Айыл тургундары ал курсагы ачканда гана айылга түшүп келип тамак издөөгө аракет кылып жатканын болжолдошууда.