"Мегакомду" орусиялык жеке ишкер сатып алууга ниеттенүүдө

MegaСom компаниясын Орусиянын жараны Елена Нагорная аттуу ишкер сатып алууга ниеттенүүдө. Бул тууралуу Мамлекеттик мүлктү башкаруу фондунан билдиришти.

Белгилүү болгондой, Елена Нагорная "Альфа Телеком" ЖАКсын сатып алуу боюнча арыз жазган. Комиссия анын сатып алуу мүмкүнчүлүктөрүн карап чыгууга макулдук берген. Азыркы тапта эки тараптуу сүйлөшүүлөр жүрүүдө.

Елена Нагорная коюлган бардык шарттарды аткарып, жакынкы күндөрдө акча каражатын которууга даяр экенин билдирген. Ал Орусияда бир нече ишканага ээлик кылат.

Шарттар боюнча компанияны сатып алууну каалагандар акциялардын 100 пайыз пакети үчүн 13,5 миллиард сомдон аз эмес акча каражатын төлөшү керек. Ошондой эле ага жалпы сумманын 7 пайызы комиссия катары кошулмак. Сатып алуучу соттук иштерди да өз моюнуна алат.

Белгиленген аукциондор өткөрүлбөй калганы үчүн MegaСom түз сатык аркылуу сатылып жатат.