Депутат көк бөрү оюну боюнча Дүйнө чемпиондугун өткөрүүнү сунуштады

Бүгүн, 27-сентябрда Жогорку Кеңештин жыйынында “Кыргызстан” фракциясынан депутат Таалайбек Масабиров көк бөрү оюну боюнча Азия жана Дүйнө чемпиондугун өткөрүүнү сунуштады.

Ал билдиргендей, аталган оюн Кыргыз элинин улуттук спорт түрлөрүнүн эӊ кызыктууларынын бири болуп саналат.

Депутат Казакстан көкпар оюну боюнча Дүйнө чемпиондугун өткөрө баштаганын эске салып, көк бөрү оюнунан кандай айырмасы бар экенин сурады.

Жаштар иштери, дене тарбия жана спорт мамлекеттик агенттигинин статс-катчысы Нуржан Бардинова эки оюндун айырмасы эрежелеринде экенин айтты. Бардинова келечекте көк бөрү оюну боюнча Азия жана Дүйнө чемпиондуктарын өткөрүү сунушун карап көрсө боло турганын белгиледи.

Жыйында кыргыз элинин унутулуп бараткан улуттук спорт оюндары менен салттуу оюндарын өнүктүрүүгө багытталган мыйзам долбоору каралууда.