Ысык-Ата районунда мугалимдерден мыйзамсыз акча чогултканы боюнча мектептин мурдагы директоруна кылмыш иши козголду

Ысык-Ата районунда мугалимдерден мыйзамсыз акча чогултканы боюнча мектептин мурдагы директоруна кылмыш иши козголду. Бул тууралуу Башкы прокуратурадан билдиришти.

Маалыматка караганда, Ысык-Ата райондук прокуратурасы Дмитриевкадагы орто мектептин мурдагы директору К.М. жана башка адамдарга карата Кылмыш-жаза кодексинин 304 (кызмат абалынан кыянаттык менен пайдалануу) жана 171 (ишенип берилген мүлктү ыйгарып алуу) беренелери боюнча кылмыш ишин козгогон.

"Дмитриевкадагы орто мектептин мурдагы директору К.М. 2016-жылдын июнь айынан 2017-жылдын сентябрь айына чейин Ш.О. аттуу мугалим жана башкы эсепчи К.Н. менен сүйлөшүп алып мугалимдерден 500 сомдон чогулткан. Чогулган 21 миң сом мектепти текшерүү үчүн келген аудиторго берилмек. Ошондой эле мектептин ремонтуна деп окуучулардын ата-энелери тарабынан чогултулган 180 миң сомдун, болгону 84 миң сому бөлүнүп берилген. Андан сырткары кеңсе товарлары үчүн айыл өкмөт тарабынан берилген 183 миң сом да өз максатында колдонулган эмес", - деп айтылат маалыматта.