БШК "Патрулдук милиция Жээнбековдун үгүт ишине көмөктөштү" деген арызды карады

Бүгүн, 28-сентябрда Борбордук шайлоо комиссиясынын жыйынында президенттикке талапкер Сооронбай Жээнбековдун үстүнөн түшкөн “Демократия жана жарандык коом үчүн" коалициясынын экинчи арызы каралды.

Ага ылайык, жүрүшкө чыккан унааларга Жээнбековго үгүттөгөн материалдар илинип, Патрулдук милиция коштоп жүргөн.

Талкуунун жүрүшүндө окуя кандай болгону тууралуу өзүнүн версиясын Жээнбековдун БШКдагы өкүлү Рашид Бекбасаров билдирди. Анын айтымында, Патрулдук милиция кызматкерлери Жээнбековдун үгүт жүрүшүн эмес Баткен жана Ооган согушунун ардагерлери уюштурган жүрүштү коштоп жүргөнүн, болгону талапкердин аты жазылган желекти көтөрүп алышкан.

Борбордук шайлоо комиссиясынын мүчөсү Атыр Абдрахматова аталган маселени тактап алуу үчүн Жээнбековдун өкүлүнө "окуя чынында кандай болгон?" деген суроо узатты.

Ага жооп кылып Жээнбековдун өкүлү: “Бул аябай чоң иш-чара болгон. Ардагерлер жолдо кыйкырып же Жээнбековго үгүттөгөн эмес. Алар болгону өздөрүнүн каржылык маселесин чечүү менен бирге партиядан жардам алып ордуна мына ушул үгүт материалын толуктаган "Сооронбай Жээнбеков" деп жазылган желекти көтөрүп жүрүшкөн”, - деди Бекбасаров.

Ошондой эле ал Патрулдук милиция кызматкери мэрия тарабынан эки коомдун тынчтык жүрүшүн коштоп жүрүү үчүн чакырылганын баса белгиледи.

Талкуунун соңунда БШКнын мүчөлөрү арызды канааттандырган жок.