Жактоочу: "Чуулуу видеодо Канат Исаев берип жаткан акча үгүт иштери үчүн гана болгон"

Бүгүн, 3-октябрда Бишкекте 2 айга тергөө абагына камалган Жогорку Кеңештин депутаты Канат Исаевдин жактоочусу Азизбек Турдалиев маалымат жыйын өткөрүүдө. Жактоочу Канат Исаев күнөөсүз экендигин айтты.

Турдалиевдин пикиринде, аны "бийликти күч менен басып алууга аракеттенген" дегенге далилдер жок.

"Интернетке тараган эки видеону тең көрдүңүздөр болуш керек. Видеодо Исаев аны менен жолугушкан балдар менен бийликти басып алуу тууралуу эч нерсе сүйлөшкөн эмес. Аны менен жолугушууда балдар өздөрү менен өздөрү эле сүйлөшүшкөн. Берип жаткан акча үгүт иштери үчүн гана берилген", - деди Турдалиев.

Эскерте кетсек, Жогорку Кеңештин депутаты Канат Исаев 30-сентябрда массалык баш аламандык уюштуруу жана бийликти күч менен басып алууга даярдык көрүү фактысы боюнча Башкы прокуратура тарабынан козголгон кылмыш ишинин алкагында УКМК тарабынан кармалган. Кечээ, 2-октябрда сот Канат Исаевди 30-ноябрга чейин тергөө абагына камакка алуу чечимин чыгарган.