Жээнбековдун шайлоо штабында биометрикалык маалыматтарды топтоого жол берген жетекчи жазаланды

Президенттикке талапкер Сооронбай Жээнбековдун штабында биометрикалык маалыматтарды чогултууга жол берген Ош шаарынын паспорт-виза жана каттоо иштери мекемесинин башчысы Ринат Алиев дисциплинардык жоопкерчиликке тартылды. Бул тууралуу Башкы прокуратуранын басма сөз кызматы билдирди.

Маалыматка ылайык, прокуратура кызматкерлери биометрикалык маалымат чогултулуп жаткан жерге барышканда ал жерде ар кандай баракчалар сакталып жатканын байкашкан. “Ошол эле учурда объект Сооронбай Жээнбековдун расмий штабы болуп эсептелбейт. Ал жерде 4 жаран биометрикалык каттоодон өткөн. Эч кандай үгүт иштери жүргүзүлгөн эмес", - деп жазылат маалыматта.

Айта кетсек, 26-сентябрь күнү Ош шаарында биометрикалык маалыматтар Жээнбековдун штабында чогултулуп жатканы белгилүү болгон. Мамлекеттик каттоо кызматы бул окуя боюнча териштирүү иши жүрүп жатканын билдирген.