Дарыгер: "Бишкекти аралай чуркаган уй 2 аялды сүзүп, биринин акырек сөөгү сынып кеткен"

Бишкекте жибин үзүп кеткен уй эки адамды сүзүп, жабыркагандардын биринин акырек сөөгү сынып кеткен. Бул тууралуу бүгүн, 4-октябрда Саламаттыкты сактоо министрлигинин басма сөз кызматынан билдиришти.

"Уй сүзүп, денесинен жабыркаган 2 аял ооруканага түштү. Алардын биринин жаракаты жеңил болгондуктан медициналык жардам көргөзүлүп, ооруканадан чыгарылды. Экинчиси улгайган аял экен кулагы начар уккандыктан уйдун келе жатканын укпай, байкабай калыптыр. Анын акырек сөөгү сынып кеткен. Учурда травматология бөлүмүндө дарыланып жатат, абалы туруктуу", - деп билдирди басма сөз кызматы.

Айта кетсек, кечээ, 3-октябрда борбордук көчөдө уй чуркап жүргөндөгү тууралуу видео интернетке тарап, кийин ал бир аялды сүзүп, ооруканага "Тез жардам" кызматы менен жеткирилген.

Маалыматка караганда, Бишкектеги курулуш компаниялардын бири курулушчуларга союп берүү үчүн уй алып келишкен. Москва жана Логвиненко көчөлөрүнүн кесилишинде уй жибин үзүп качып кеткен. Киев көчөсүндө унаалардын арасында чуркап жүргөндө интернет колдонуучулары видеого тартып алган. Кийин Патрулдук милициянын кызматкери кармап, аны ээсине кайтарып берген.