ТИМ: "Алматыга жакын жерде кыйраган учакты Кыргыз жараны башкарып бараткан" деген маалымат такталып жатат"

Тышкы иштер министрлиги бүгүн, 4-октябрда "Алматыга жакын жерде кыйраган учакты Кыргыз жараны башкарып бараткан" деген маалымат такталып жатканын билдирди.

Билдирүүдө "Алматы шаарынын жанында санитардык авиациянын АН-28 үлгүсүндөгү учагынын кыйрашынан 5 киши каза болуп, экипаж башчысы Кыргыз жараны болгон деген маалыматты министрлик тактап жатат. Азыркы учурда Алматыдагы Башкы консулдугубуз казак тараптын тиешелүү органдары менен байланышууда" деп айтылат.

Айта кетсек, кырсык 3-октябрь күнү кечинде Алматыга жакын жерде болгон. Анда Алматы-Шымкент багытында абага көтөрүлгөн АН-28 учагы 12 мүнөттөн соң радардан жоголуп кеткен. Кийин учакты күйүп жаткан абалда жерден табышкан.

Учактын ичинде 3 экипаж мүчөсү жана 2 дарыгер болгон. Алар оор абалдагы жаңы төрөлгөн балага медициналык жардам көрсөтүү үчүн баратышкан.

Ошондой эле казакстандык жалпыга маалымдоо каражаттары каза болгондордун арасында Г.Н.Цой аттуу Кыргыз жараны бар экенин жана ал учактын командири болгонун жазышты.