Ирландиялык окумуштуулар көз жаштан жана шилекейден электр энергиясын алууну үйрөнүштү

Ирландиянын Лимерик университетинин окумуштуулары шилекейдин жана көз жаштын курамындагы лизоцим ферменти электр энергиясын чыгара ала турганын далилдешти. Бул ачылыш тууралуу чет элдик басылмалар бүгүн, 4-октябрда жазып чыгышты.

"Лизоцимдин кристаллдарын шилекей жана сүт бездери, көздүн былжыр чел кабыгы иштеп чыгарат. Канаттуулардын жумурткасынын белогу дагы бул затка бай. Аны табигый булактардан алса болот", - деп изилдөө иштерин жетектеген Ами Степлтон билдирген.

Окумуштуулар лизоцим ферментинин буга чейин белгисиз болгон касиетин ачышып, механикалык термелүүлөрдүн таасири менен аталган белоктон электр тогу иштелип чыгарын тастыкташкан.