ӨКМ: "Жалал-Абад-Казарман унаа жолу 2018-жылдын жаз айларына чейин жабылды"

Жалал-Абад-Казарман унаа жолу жабылды. Бул тууралуу бүгүн, 5-октябрда Өзгөчө кырдаалдар министрлигинин кризистик абалды көзөмөлдөө борборунун жетекчиси Азамат Мамбетов маалымат жыйынында билдирди.

"Жалал-Абад-Казарман унаа жолу 2018-жылдын май, июнь айларына чейин жабылды. Анткени 30-сентябрда жааган калың кардан улам жолдо жүрүү мүмкүнчүлүгү болбой калган. Жол каттамын токтотуп, жолду жабуу чечими райондун акиминин буйругунун негизинде ишке ашырылды. Эми каттам кийинки жылдын май айларында Күн жылыганда ачылат", - деп билдирди Мамбетов.

Маалыматка ылайык, Жалал-Абад-Казарман унаа жолундагы ашуунун бийиктиги 3062 метрге жетет.

Эске салсак, буга чейин Тогуз-Торо районунда кар көп жаагандыгына байланыштуу унааларга кооптуу абал жаралып, Жалал-Абад-Казарман унаа жолу убактылуу жабылган.