ӨКМ: "Бишкек-Ош жолундагы унаа тыгындары жана чектөөлөр айдоочулардын кайдыгерлигинен улам болууда"

Бишкек-Ош жолунда жаралган тыгындар жана коопсуздук үчүн киргизилген чектөөлөр айдоочулардын кайдыгерлигинен улам болууда. Бул тууралуу бүгүн, 5-октябрда Өзгөчө кырдаалдар министрлигинин кризистик абалды көзөмөлдөө борборунун жетекчиси Азамат Мамбетов маалымат жыйынында билдирди.

“Бишкек-Ош унаа жолунда кар жаагандан кийин жол тайгак болуп унаалар жайкы дөңгөлөктөрү менен туруп калып тыгын жаралууда. Натыйжада кайра-кайра чектөөлөр киргизилип жатат. Кечээ, 4-октябрь күнү 3 жолу чектөө киргизилди. Бул тыгындын негизги себеби айдоочулардын кайдыгерлиги болууда. Алар кар жаагандыгына карабастан жайкы дөңгөлөктөрүн алмаштырбай жолго чыгып жатат", - деп билдирди Мамбетов.

ӨКМ айдоочуларга жайкы дөңгөлөктөр менен узак жолго чыкканга болбостугун, дөңгөлөктөрдү алмаштырып, унаанын техникалык абалын текшерүүнү эскертти.