Бишкекте курулуп жаткан эң чоң мечитке кимдин ысымы берилери белгилүү болду

Бишкекте курулуп жаткан эң чоң мечитке дин аалымы, имам Сарахсийдин ысымы берилет. Бул тууралуу бүгүн, 6-октябрда Кыргыз мусулмандарынын дин башкармалыгынан билдиришти.

Маалыматка караганда, Түркия элчисинин дин иштери боюнча кеңешчиси Шемсуддин Үнал менен Кыргыз муфтийи Максатбек Токтомушев жолугушуп, Бишкек шаарында курулуп жаткан Орто Азиядагы ири мечиттин иштөө тартиби боюнча эки тараптуу келишимдин долбоорун талкуулашкан.

"Эки тараптуу жолугушуунун алкагында Орто Азиядагы ири мечит болгондуктан ага республикалык борбордук мечит макамы берилип, бул боюнча тиешелүү документтер иштелип чыкмакчы. Ал эми муфтий Максатбек Токтомушев мечитке улуу дин аалымы, имам Сарахсийдин ысымын ыйгаруу боюнча сунушун берип, тараптар бул боюнча бир пикирге келишти. Ошондой эле Кыргыз мусулмандарынын дин башкармалыгынын алдында Ислам изилдөө борборунун курулары туурасында сөз болуп, ал заманбап технологиялар, электрондук системалар менен жабдылып, окутуу иштери, семинарлар жана тренингдер өтүп, диний баалуулуктарды изилдөөчү борбор болуп калары белгилүү болду", - деп билдиришти муфтияттан.

Айта кетсек, Абу Бакр бин Мухаммад бин Ахмад бин Аби Сахл Ас Сарахси Ислам дининдеги Ханафий мазхабы жана фикх илими жөнүндөгү бир нече китептерди жазган атактуу ислам аалымы болгон. Айрым тарыхый булактардагы маалыматтар боюнча ал 1090-жылдары жашап өткөн. Имам Сарахси Караханид мамлекетинин Марв (Мерв) жана Найсапур (Нишапур) шаарларынын ортосунда жайгашкан Сарахс деген жерде төрөлгөндүгү үчүн өз атына жердигин билдирип турган “Сарахси” (сарахстык) сөзү кошулуп айтылып калган.