Ошто 53, 46 жаштагы ден соолугунун мүмкүнчүлүгү чектелген эки баласын баккан 80 жаштагы эненин бир уулу каза болду

Ош шаарында оор турмушта жашап, ден соолугунун мүмкүнчүлүгү чектелген эки уулун баккан 80 жаштагы Калипа Ибрагимованын уулу каза болду. Бул тууралуу бүгүн, 6-октябрда SUPER.KG порталына Ибрагимова өзү айтып берди.

"Буга чейин коомчулукка жалпыга маалымдоо каражаттары аркылуу кайрылып, эки баламды дарылоо керектигин айткан элем. Каражаттын жоктугунан дарылай албай калдым. Каза болгон уулум 53 жашта. 2010-жылы белгисиз адамдар тарабынан катуу сабалган эле. Ошондон бери башынан алган соккудан жакшы боло албай кыйналып жүрдү. Эми минтип оорудан улам каза болуп калды. Баламдын күйүтүнөн жүрөгүм сыгылып, ыйлап жүрөм. Жардам берген эч ким жок. Жашоо шартыбыз оорлошуп кетти", - деп билдирди Ибрагимова.

Эске салсак, буга чейин Калипа Ибрагимованын ден соолугунун мүмкүнчүлүгү чектелген эки уулу бар экени, алардын бири психикалык жактан жабыркаган, экинчисинин эки көзү көрбөй калганы айтылган.