Бишкек жылуулук ишканасы: "Абанын температурасы +8 градустан төмөн болгон учурда жылуулук бериле баштайт"

Бишкек шаарында көп кабаттуу үйлөргө жылуулук берүү абанын температурасы 5 күн катары менен +8 градустан төмөн болгон учурда бериле баштайт. Бул тууралуу бүгүн, 6-октябрда Бишкек жылуулук ишканасынын башчысы Эркин Абдыкалыков маалымат жыйынында билдирди.

"Бишкекте жылуулук берүүнүн атайын киргизилген талаптары бар. Эгерде абанын жылуулугу 5 күн катары менен +8 градустан төмөн болгон учурда жылуулук бериле баштайт. Учурда абанын температурасы көрсөтүлгөн нормадан жогору болууда. Өткөн 2016-жылы 14-октябрда, ал эми эң кеч 2002-жылы ноябрь айында берилген. Негизи жылуулук октябрь айынын аягында берилип жүрөт", - деди Абдыкалыков.

Эркин Абдыкалыков кыргызгидрометтин маалыматына таянып жакынкы күндөрү абанын температурасы жылуу болорун, болжолдуу октябрь айынын аягында калкка жылуулук берилерин айтты.