ЖЫЛНААМА, 8-ОКТЯБРЬ: Белгилүү актёр жана режиссёр Мурат Мамбетов 62 жашка толду

Бүгүн, 8-октябрда Кыргыздын белгилүү актёру жана режиссёру Мурат Мамбетов 62 жашка толду. Актёрду куттуктап байланышка чыкканыбызда, туулган күнүн белгилебей тургандыгын билдирди.

"Чынын айтсам, бүгүн туулдум эле деп өзгөчө сезимдерге балкыган жокмун. Кадимкидей эле үйдө, үй-бүлөмдүн жанында отурам. Менчик майрамым менен алгачкылардан болуп кызым куттуктаган, андан соң жалпы кесиптештерим, жакындарым байланышка чыгып, кезек-кезеги менен жылуу сөздөрүн арнашууда. Бул күндү белгилейин деген план жок, үйдө эле болом. Ал эми үйгө азыр эле Гүлнур кайнежем (ред. Сатылганова) "Туулган күнүң менен" деген ырды англисче ырдап шаңдуу маанай менен кирди. Аны менен эми учурашып жатсам, силер чалдыңар", - деди актёр.

Белгилей кетсек, Мурат Мамбетов 1955-жылы 8-октябрда туулган. Ал "Аян", "Чиркин өмүр", "Апамдын махабаты", "Кууш жолдо", "Кара жолтой", "Тор", "Күлкүлятор", "Уламыштар" тасмаларына режиссёрлук кылып, айрымдарына өзү да тартылган. Ролдорду берилүү менен ийинине жеткире аткаргандыктан айрымдар үчүн фильмдердеги образы "Жаздык", "Композ" деген аттар менен көбүрөөк таанымал.

8-октябрдын жылнаамасы.