ЖЫЛНААМА, 9-ОКТЯБРЬ: 50 жыл мурун латын америкалык революциячы Эрнесто Че Гевара атып өлтүрүлгөн

Латын америкалык революциячы, Кубанын тунгуч өндүрүш министри, күрөштүн символу болуп калган Эрнесто Че Гевара 50 жыл мурун, 1967-жылдын 9-октябрында өкмөттүн аскерлери тарабынан курчоого алынып атып өлтүрүлгөн.

Че Гевара1928-жылы 14-июнда Аргентинанын Росарио шаарында архитектордун үй-бүлөсүндө төрөлгөн. 1955-жылы Че Гевара Фидель Кастро менен таанышып, кийин анын революциялык отрядына кошулган. Эки жылдан кийин ири колоннаны башкарган. 1959-жылы революция жеңгенде Че Гевара Кубанын жарандыгын алып, саясатка аралашкан. Кийин Че Гевара мамлекеттик кызматтан кетет. 1,5 жылдан кийин Боливиядагы көтөрүлүшчүлөр менен бирге экендиги маалым болгон. Ал Боливияда партизандар кыймылын уюштурат.

Че Гевара түзгөн партизандык отряд өкмөттүн аскерлери тарабынан курчоого алынып, 1967-жылдын 9-октябрында аны атып өлтүрүшкөн. Ал эми анын сөөгүн элдин кароосуна таштап коюшкан. Көп жылдар бою Геваранын көмүлгөн жери жашыруун болуп, арадан 30 жыл өткөндөн кийин гана сөөгү кайсы жерге көмүлгөнү билинген. 1995-жылы боливиялык армиянын генералы "Че Гевара аба майданынын учактар уча турган тилкесине катарлаш жерде өлтүрүлгөн эле жерге коюлган" деп билдирген.

Эки жылдан кийин анын дүйнөдөн кайтканынын 30 жылдыгына карата сөөгү эксгумацияланып, мекени Кубага жиберилген. Азыр анын сөөгү Че Геваранын мавзолейинде коюлган. Бирок айрымдар 1997-жылы команданттын өзүнүн сөөгү коюлганына ишенбей да келишет.

9-октябрдын жылнаамасы.