Аксыда мурда зордуктоо фактысы боюнча соттолгон жаран 44 жаштагы аялдын өлүмүнө шектелип кармалды

Жалал-Абад облусунун Аксы районунда мурда, союз мезгилинде зордуктоо фактысы менен соттолгон жаран 44 жаштагы аялдын өлүмүнө шектелип кармалды. ИИМдин маалымат кызматынан кабарлашкандай, 24-сентябрь күнү кечинде Аксы РИИБине жергиликтүү тургун телефон чалып, Кош-Дөбө айыл өкмөтүнүн аймагындагы Кербен-Таш-Көмүр унаа жолунун 42-чакырымында белгисиз аялдын жансыз денеси жатканын билдирген.

Тергөө учурунда өлгөн аялдын ким экендиги такталып, ал Таш-Көмүр шаарынын 44 жаштагы жашоочусу жана экинчи топтогу майып экендиги аныкталган. Факты боюнча Аксы РИИБи тарабынан Кыргыз Республикасынын Кылмыш-жаза кодексинин 97-беренесинин (адам өлтүрүү) негизинде кылмыш иши козголуп, иликтөө иштери башталган.

Иликтөө аракеттеринин негизинде жогорудагы кылмыш болгон аймакта жайлаган малчылар суракка алынган. Натыйжада кылмышка шектүү катары 58 жаштагы А.Э. аттуу жаран кармалган. Маалымат боюнча шектүү ушул эле аймакта бирөөнүн малын багат.

Окуя тууралуу айта кетсек, ал күнү бир нече адам чогулуп алып спирт ичимдигин ичишкен, анын ичинде өлгөн аял дагы бар. Кийинчерээк калганы тарап үйлөрүнө кетишип, кылмышка шектүү менен каза болгон аял гана калган. Ортодон чыккан чырдан кийин аялдын денесине оор жаракат келтирип, таштап кетип калган.

Милиция кызматкерлери тарабынан шектүү сарайда уктап жаткан жеринен кармалган. Тергөө учурунда кылмышка шектүү мурда бир нече жолу соттолгону такталган. Ал СССР учурунда ошол учурдагы 108-беренеси (зордуктоо) боюнча сот жообуна тартылган. Азыркы учурда тергөө амалдары жүрүп жатат.