Дональд Трамптын биринчи жубайы президенттин азыркы деңгээлине жетишине себепкер экенин айтты

АКШнын президенти Дональд Трамптын биринчи жубайы Ивана Трамп америкалык телеканалдардын бирине берген маегинде президенттин азыркы деңгээлге жетишине себепкер экенин айткан.

Ошондой эле ал Дональд Трамп менен жумасына бир жолу сүйлөшүп турарын билдирген.

"Ал азыр деле мага кеңеш сурап кайрылып турат. Твиттерге бир нерсе жазардан мурда постту жарыялоо зарылчылыгын менден сурайт. Анын социалдык тармакка ар кандай маалыматтарды жазып турушун туура деп эсептейм. Себеби бул коомчулукка ойду жеткирүүнүн жаңы ыкмасы", - деген ал.

Ивана Трамп интервьюда кооз үйлөрү бар экенин айтып, азыркы жашоосуна ыраазы экенин кошумчалаган. Андан сырткары уулу Эрик жана кызы Иванка менен сыймыктанарын айткан.

Белгилей кетсек, мурдагы актриса жана фотомодель Ивана Трамп Дональд Трамп менен 1977-1992-жылдары никеде болгон.