БШК: "Талапкер талаптарды кайталап бузса, шайлоого 5 күн калганына карабай БШК анын каттоосун жокко чыгарууга укугу бар"

Талапкер талаптарды кайталап бузган болсо, шайлоого 5 күн калганына карабай БШК анын каттоосун жокко чыгарууга укугу бар. Бул тууралуу бүгүн, 10-октябрда аталган мекеменин басма сөз кызматы билдирди.

“Кыргыз Республикасынын президенти жана Жогорку Кеңештин депутаттарын шайлоо жөнүндө” мыйзамынын 46-беренесинин 2-бөлүмүндө жазылган.

Талапкердин каттоосу добуш берүү күнүнө чейин 5 календарлык күн калгандан кечиктирбестен, төмөнкү учурларда жокко чыгарылат:

1) талапкер өз талапкерлигин алып салуу жөнүндө арыз бергенде;

2) саясий партия кээ бир талапкерлерди шайлоого талапкерлердин тизмесинен чыгарганда;

3) өзүнүн шайлоо өнөктүгүн каржылоодо талапкер шайлоо фондунун каражаттарынан тышкары, талапкердин шайлоо фондуна келип түшкөн акча каражаттарынын жалпы суммасынын 0,5 пайыздан ашыгын түзгөн башка акча каражаттарын пайдаланганда же талапкер өзүнүн шайлоо фондунун каражаттарынан чыгымдарды шайлоо фондундагы каражаттардын бардык чыгымдарынын белгиленген суммасынын чегинен 0,5 пайыздан ашык чыгымдаганда;

4) ушул Конституциялык мыйзамдын 21-берене (Талапкердин статусу), 53-берене (Президенттин кызматына талапкерлерди каттоо) жана 61-берене (Жогорку Кеңештин депутаттыгына талапкерлердин тизмесин каттоо) аныкталган каттоо эрежелери бузулганда;

5) талапкердин, анын өкүлдөрүнүн талапкерди шайлоо максатында кызмат ордунун же кызматтык абалынын артыкчылыктарын пайдалануу же анын өкүлдөрүнүн талапкерди шайлоо максатында кызмат ордунун же кызматтык абалынын артыкчылыктарын пайдаланууларына талапкердин катышы бар экенинин фактылары далилденгенде;

6) талапкердин, анын өкүлдөрүнүн шайлоо алдындагы үгүт жүргүзүү эрежелерин бузууга түздөн-түз катышуу фактылары далилдегенде;

7) талапкердин, анын ыйгарым укуктуу өкүлдөрүнүн, ишенимдүү адамдарынын, байкоочулардын, ошондой эле жакын туугандарынын шайлоочуларды сатып алуу же алардын шайлоочуларды сатып алууларына катышуу фактылары далилденгенде;

8) талапкерге карата соттун айыптоо өкүмүнүн күчүнө кириши.

Ошону менен катар эле аталган мыйзамдын 22-беренесинде (Шайлоочуларды кабарландыруу жана шайлоо алдында үгүт жүргүзүү) 27-беренесинде (Басылма, укма-көрмө жана башка үгүт материалдарын чыгаруу жана таратуу) белгиленген талаптарды бузган учурда, тиешелүү шайлоо комиссиясы аларга бузуулар жөнүндө жазуу жүзүндө эскертүүгө укуктуу. Талапкер, саясий партия жогоруда көрсөтүлгөн талаптарды бир нече ирет бузган учурда, БШК тиешелүү шайлоо комиссиясынын сунуштамасы боюнча же өз демилгеси боюнча талапкерди, талапкерлердин тизмесин каттоону жокко чыгаруу тууралуу чечим кабыл алууга укуктуу.