Ысык-Көлдө сабалып, көчөдө жатып калган аял каза болду. Кылмышка шектүү катары бир тууган ага-инилер кармалды

Ысык-Көл районунун Бостери айылында 27 жаштагы аял сабалып, каза болду. Бул тууралуу бүгүн, 11-октябрда Ысык-Көл ОИИБинин басма сөз кызматынан билдиришти.

Маалыматка ылайык, 10-октябрь күнү эртең менен Бостери айылында сабалып, көчөдө эс-учун билбей жаткан аялды жергиликтүү тургундар көрүшүп, "Тез жардам" кызматын чакырышкан. Ооруканага жеткирилген аял өзүнө келбей жандандыруу бөлүмүнөн көз жумган.

"Каза болгон аял Ак-Суу районунун Теплоключенка айылынын 27 жаштагы Э.С. аттуу тургуну экендиги аныкталды. Бул факты боюнча Ысык-Көл райондук ички иштер бөлүмүнүн кызматкерлери иликтөө иштерин жүргүзүшкөн. Натыйжада шектүү катары Бостери айылынын тургундары, бир туугандар 31 жаштагы Ж.А. жана 32 жаштагы Ж.Б. аттуу тургундар кармалышкан", - деп билдирди басма сөз кызматы.

Кылмыш иши козголуп, шектүүлөр райондук милициянын убактылуу кармоочу жайына киргизилди.