Супер-Инфо
super.kg видео
Орусия Кыргыздын түштүгүнө экинчи аскердик базасын жайгаштыруудан баш тартты
"Кыргыз бийлиги Орусия Федерациясына экинчи аскердик базасын жайгаштырууну сунуштады. Бирок Москва аскердик базалардын санын арттырууга кызыкдар эмес, учурда бир база бар, ошол жетиштүү", - деп Орусиянын тышкы иштер министринин орун басары Григорий Карасин "РИА-Новости" маалымат агенттигине интервью берип жатып билдирди.
Карасин Кыргыз мамлекети менен Тажикстандын чек арасына Орусиянын экинчи аскердик базасын жайгаштыруу боюнча Бишкек расмийлери менен жүргүзүлгөн сүйлөшүүлөр туурасындагы суроолорго жооп берип жатып төмөнкүлөрдү айтты.
"Орусия башка белгилүү өлкөлөрдөн айырмаланып, өзүнүн аскердик базаларын дүйнөнүн баарына жайгаштырууну максат кылбайт. Биз сандардын артынан куубайбыз. Биз үчүн чет өлкөлөргө базаларды жайгаштыруунун зарыл болгон максатка ылайыктуу аныктоочу факторлору бар. Ал Орусия менен коңшу, союздаш мамлекеттердин коопсуздугун камсыздоо менен байланыштуу", - деди ал.
"Борбор Азияда Кыргыз, Тажик мамлекеттериндеги Орусиянын аскердик базалары аймактарда жаралган коркунучтарды жолго коюуга мүмкүнчүлүгү жетиштүү. Орус тарап айтылган базалардын аскердик кубатын чыңдоого басым жасайт. Мындан тышкары биздин өнөктөштөрдүн аскердик күчтөрү менен биргеликте аскердик даярдоолорго, окутууларга көңүл бурулат жана инфраструктуралык шарттар жакшыртылат", - деп кошумчалады Карасин.
Белгилей кетсек, 2003-жылы сентябрь айында Орусия Кыргыз өлкөсү менен Кант шаарына аскердик базасын жайгаштыруу үчүн 15 жылдык келишим түзгөн. База Жамааттык коопсуздук келишими уюмунун алкагында ачылган. 2012-жылы кабыл алынган келишим кайра каралып, аскердик базанын мөөнөтү дагы 15 жылга узартылган. Бул келишим быйыл 2017-жылдын январь айында күчүнө кирген. Келишимге ылайык, он беш жылдык мөөнөт менен 2032-жылга чейин орусиялык база Кыргыз өлкөсүндө ишин улантат.
0
1 |