Бийиктиктен шаарга назар салган "Бишкектин тумары" аттракциону ишке кирди

Бишкек шаарынын ортосунда жайгашкан Панфилов атындагы сейил багында бийиктиктен назар салуучу айланма дөңгөлөктүн салтанаттуу ачылышы болуп өттү.

Иш-чара кечээ,12-октябрда сейил бакта болуп, ага мэриянын өкүлдөрү, демөөрчүлөр жана парк жетекчилиги катышты.

Бул аттракционго ат коюш үчүн социалдык тармактарда сынак жарыяланган. Анда сейил бак жетекчилигине көптөгөн аталыштар сунушталып, алардын ичинен "Бишкектин тумары" тандалып алынган. Аны сунуштаган жеңүүчүгө аттракционго бир жыл бою бекер түшүү абонементи ыйгарылды.

Сейил бактын жетекчиси Дмитрий Петров маалымдагандай, бул долбоор демөөрчүлөр тарабынан ишке ашкан: "Аттракцион Орусиядан жасалып келди, коопсуздук маселесине көп көңүл бурулгандыктан орнотуу иштери бир жылдан ашык убакытка созулду. Жалпысынан долбоорго 40 миллион сом жумшалды. Бул шаар үчүн чоң белек, шаар тургундары жана коноктору ага аяр мамиле кылат деп ишенем", - деди ал.

Аттракциондун бийиктиги 50 метрди түзөт. Мурунку аттракциондон айырмаланып "Бишкектин тумарында" электр жарыгы, кондиционер орнотулган. Бийиктиктен шаарга көз салууну каалагандар андагы айнек менен тосулган ыңгайлуу бөлмөлөрдөн орун алат.

Эскерте кетсек, "Бишкектин тумары" орноштурулган орундагы мурдагы аттракцион 2016-жылдын февраль айында эскилиги жеткендигине байланыштуу реконструкциялоого берилген.

Айланма дөңгөлөк үстүндөгү кабинкага отуруп, шаарга көз салуу үчүн тургундар киши башына 100 сомдон төлөшөт.