Ат-Башыда асынып алган кыздын өлүмүнө байланыштуу окуучуларга түшүндүрүү иштери жүргүзүлөт

Ат-Башыда асынып алган окуучу кыздын өлүмүнөн улам суициддин алдын алуу үчүн түшүндүрүү иштери жүргүзүлөт. Бул тууралуу бүгүн, 13-октябрда Нарын облусунун Ат-Башы районунун үй-бүлөнү жана балдарды коргоо башкармалыгынын башчысы Жайлообек Асаналиев билдирди.

"Биз негизи жылда 2-3 жолу райондун жетекчилиги, прокуратура жана билим тармагынын өкүлдөрү менен чогуу жер-жерлерге барып ата-энелерге чогулуш өткөрүп, балдарга түшүндүрүү иштерин жүргүзүп турабыз. Бирок 8-октябрдагы окуучу кыздын өлүмүнө байланыштуу пландан тышкары түшүндүрүү ишин жүргүзөлү деп жатабыз. Учурда райондун жетекчилиги менен биргеликте атайын график түзүлдү, 17-октябрдан баштап жер-жерлерди кыдырып, зордук-зомбулуктун, суициддин алдын алуу максатында түшүндүрүү иштерин жүргүзүп баштайбыз", - дейт Асаналиев.

Жайлообек Асаналиев кызы каза болгон үй-бүлөнүн жашоо шарты жакшы экендигин, социалдык колдоолорго муктаж эмес болгондугун жана асынып алган кыз мектепте активдүү, жакшы окуган окуучулардан болгонун кошумчалады.