Кыргыздын "Адэм" бий тобу эл аралык сынакта калыстарды таң калтырып, көрүүчүлөрдүн ордунан туруп узакка кол чабуусуна арзыды (видео)

Кыргыздын "Адэм" бий тобу "Asia’s Got Talent" деп аталган сынакта «алтын баскычка» ээ болду. Бул тууралуу бийчи Атай Өмүрзаков өзүнүн Инстаграмдагы баракчасына жазды. Бий тобунун жеңишин жарыялаган Атай аларга демөөрчүлүк кылган ишканаларга ыраазычылык билдирген.

Төрт баладан турган бий тобунун өзгөчө пластикасы - бирде туруп сөөгү жок адамды көрсөтсө, бирде туруп сөөктөр кырчылдап сынып кеткендей түр көрсөткөн аткаруусу калыстар тобун таң калтырып, көрүүчүлөрдүн ордунан туруп көпкө чейин кол чабуусуна арзыды. Бийчилердин өнөрүнө күбө болгондордун таң калган жүздөрү видеодон ачык-айкын көрүнүп, соңунда калыстар кубануу менен талантына таазим кылып "алтын баскычты" басып, мекендештерибизди кубандырды.

Алгач Кыргыз бийчилери өздөрүн тааныштырып жатканда Кыргыз Республикасын калыстарга бир нече ирет кайталашса, алардын бийин көрүп жатып калыстар бул сөздү кайталап жатышты. Мыкты даярдык, мыкты форманын айкалышынын натыйжасы бийчи жигиттерди чоң кубанычка бөлөдү.

Asia Got Talent - Борбордук Азиядагы ырчы, бийчи, иллюзионист жана башка өнөрлүү адамдар арасында жаш куракты ылгабай өткөрүлгөн сынак. Аталган шоу 2015-жылдын 12-мартынан баштап Азия өлкөлөрүндө көрсөтүлө баштаган. Анда атаандаштар 100 миң доллар өлчөмүндөгү байгеге ат салышат.

Атай Өмүрзаков жетектеген бул "Адэм" бийчилер тобу сынакта "алтын баскычка" ээ болуп, дүйнөнүн каалаган өлкөсүнө барууга мүмкүнчүлүк алышты.