БШК сайтында добуш берүүнүн жүрүшү көрсөтүлүп калганы боюнча түшүндүрмө берди

14-октябрда Борбордук шайлоо комиссиясынын сайтында президенттик талапкерлерге добуш берүүнүн жыйынтыктары көрсөтүлүп жаткан. БШК сайтында добуш берүүнүн жүрүшү көрсөтүлүп калганы боюнча түшүндүрмө берди.

"2017-жылдын 1-октябрынан тартып Кыргыз Республикасынын президентин шайлоо күнүнө даярдыктардын алкагында шайлоо участкаларында автоматтык эсептегич урналар (АЭУ) менен борбордук сервердин интернет байланышын камсыздоочу жабдууларды текшерүү жүрүп жатты.

Шайлоонун жүрүшүн байкоо үчүн 59 мамлекеттен 773 эл аралык байкоочу келди. БШКнын демилгеси менен 14-октябрда маалыматтык добуш берүү системи менен автоматтык эсептегич урналарды байкоочуларга көрсөтүү уюштурулду. Мындан улам АЭУдан маалыматтарды кабыл алуучу сервер ачылган. Презентация учурунда АЭУ реалдуу режимде маалыматтарды борбордук серверге жөнөтүп, ошол мезгилде жыйынтык маалыматтык добуш берүү системинде сайтка маалыматтар чыгып калган. Кийин маалымат сайттан алынган.

БШК сайттагы маалыматтар алдын ала добуш бергендердин жыйынтыктары эместигин белгилеген. Имараттан сырткары добуш бергендердин бюллетендери автоматтык эсептегич урналарга добуш берүү бүтөргө жакын 15-октябрда гана салынат", - деп айтылат маалыматта.

Айта кетсек, кечээ, 14-октябрда саат 17:30 чамасында көчмө урна менен добуш берүү жүргүзүлгөн. Бирок Кыргыз Республикасынын Конституциялык мыйзамы одоно бузулуп, Борбордук шайлоо комиссиясынын сайтында президенттик талапкерлерге добуш берүүнүн жыйынтыктары көрсөтүлүп жаткан.