Саат 10:00гө карата шайлоочулардын 7,5 пайызы добуш берди. Ош облусу эң активдуу болууда

Өлкөдө саат 10:00гө карата шайлоочулардын 7,5 пайызы добуш берди. Бул тууралуу бүгүн, 15-октябрда Борбордук шайлоо комиссиясынын мүчөсү Абдыжапар Бекматов маалымат жыйынында билдирди.

“Учурда саат 10:00гө алынган жыйынтык боюнча өлкөдө шайлоочулардын 7,5 пайызы добуш берди. Жалпы эсеп менен 227 миң шайлоочу добуш берди", - деди ал.

"Добуш берүүдө Ош облусу активдүү болууда, Ошто 10,4 пайыз шайлоочу катышты. Ал эми Таласта шайлоочулардын 8,5 пайызы, Баткенде 7 пайызы, Ысык-Көлдө 8 пайызы, Нарында 8 пайызы, Бишкек шаарында 7 пайызы, Чүйдө 6 пайызы, Жалал-Абадда 7 пайызы добуш берди. Ошондой эле чет өлкөлөрдө 37 шайлоо участкасы ачылган. Алар эми гана иштеп башташты, чет өлкөдөгү жарандарыбыздын 1,5 пайызы добуш беришти”, - деди Бекматов.

Андан сырткары ал өлкө боюнча алты шайлоо тилкесинде техникалык себептер менен добуш берүү бир аз убакытка кечеңдетилгенин, бирок тоскоолдуктар тез арада жоюлганын айтты.