Чет өлкөлүк байкоочулар "шайлоодо мыйзам бузууларды кездештире элекпиз" дешти

Бүгүн, 15-октябрда президенттик шайлоого Индонезиядан эл аралык байкоочу болуп катышууга келген Ариф Будиман маалымат жыйын өткөрдү.

"Биз эл аралык байкоочулардын конференциясына, Борбордук шайлоо комиссиясынын төрайымынын маалымат жыйынына катыштык. Шайлоо тилкесине барып, шайлоонун жүрүшү менен тааныштык. Өлкөдө шайлоо тынч, ачык-айкын жана таза өтөт деп ишенем. Мыйзам бузууну кездештирген жокпуз", - деди Будиман.

Айта кетсек, бүгүн өлкөдө президенттик шайлоо старт алды. Шайлоого 13 талапкер аттана турганы мурда белгилүү болгон. Эки талапкер Камчыбек Ташиев жана Бакыт Төрөбаев талапкерлигин алып салган. Кийинчерээк Азимбек Бекназаров талапкерлигин ала турганын айткан. Бирок Борбордук шайлоо комиссиясы Бекназаровдун баш тартканын кеч жарыялаганы үчүн анын талапкерлигин алып салган эмес.