Чет өлкөдөн добуш берүүгө катталган Кыргыз жарандар шайлоого пассивдүү катышууда

Бишкектин сааты боюнча 17:00гө карата чет өлкөдөн добуш берүүгө катталган 18 миң 580 шайлоочудан 3 миң 380и шайлоого катышты. Бул тууралуу бүгүн, 15-октябрда Тышкы иштер министрлигинин маалымат катчысы Айымкан Кулукеева билдирди.

Мындан тышкары ал чет жактан добуш берүүгө катыша албай калган жарандардын нааразычылыгынын себептерин айтып берди.

“Дүйнөнүн 27 мамлекетинде шайлоо 36 участкасы ачылып иштеп жатат. Азыркы убакытка чейин чет өлкөдөгү шайлоочулардын 18 пайызы катышты десек болот. Көпчүлүк чет жакта жүргөн жарандар добуш бере албай калдык деп нааразы болууда. Бирок биз консулдук элчилик аркылуу гана добуш берүүнү уюштура алабыз", - деди Кулукеева.

"Шайлоого добуш берүү үчүн эки талап болот. Консулдук каттоого турушу керек. Биометрикалык маалымат тапшырышы керек. Көп жарандар бул талаптарды аткара албагандыктан шайлоого катыша албай жатат. Азыркы саатка карата Орусиянын Владивосток шаарында 407 Кыргыз жараны катталып, 79 жаран шайлоого катышкандыгы такталды”, - деди ТИМдин өкүлү.