ШКУнун баш катчысы Кыргыздагы президенттик шайлоого өзүнүн баасын берди

Шанхай кызматташтык уюмунун баш катчысы Рашид Алимов Кыргыздагы президенттик шайлоо көз карандысыз, таза, ачык өтүп жатканын айтты. Мындай оюн ал бүгүн, 15-октябрда маалымат жыйында билдирди.

“Кыргыз Республикасы 2001-жылдан баштап ШКУнун түптөөчү мамлекеттердин бири. Бул өлкөдө эмне болуп жатканы бизди дагы кызыктырат. ШКУнун мүчөлөрү эл аралык байкоочу катары шайлоо тилкелерин кыдырып чыкты. Мен дагы бир шайлоо тилкесине барып келдим. Шайлоо комиссиясынын төрагалары менен баарлашып, шайлоонун жүрүшү менен тааныштык. Маанилүү нерсени белгилеп койсок, БШК добуш берүүгө бардык шарттарды түзүп бериптир. Баарынан дагы ден соолугунун мүмкүнчүлүгү чектелген жарандар өлкөдөгү маанилүү тарыхый окуяга кайдыгер карабастан шайлоого катышканына ыраазы болдук. Шайлоо тилкелеринде иш алып барып жаткандар жарандарга добуш берүүнүн эрежелери менен тааныштырып жатат. Мындайча айтканда президенттик шайлоо жогорку деңгээлде өтүп жатат”, - деди Алимов.