Бабанов: "Адам күйгөн сайын курч болот. Биз бекем болдук"

"Мен ар дайым бийликти эч качан күч менен басып албайм деп айтып келем жана айта берем. Ошондой эле азыр жана келечекте дагы бийликти басып алалы деп жаткан жокпуз. Мен элден, шайлоочулардан жана командаман чагымчыл күчтөргө алдырбоону суранып кетет элем. Биз менин тарапташтарымдын, шайлоочуларымдын жана үгүтчүлөрдүн укуктарын бир гана мыйзамдуу жол менен коргойбуз. Ошондой эле мен биздин жеңиш сөзсүз түрдө келечекте ишке ашат деп ишенем. Жакшы сөз бар, "бизди өлтүрбөгөн нерсенин баары бизди курчутат" деген. Адам күйгөн сайын курч болот. Мени жана менин командамды курчутушту, биз бекем болдук".

Мындай оюн бүгүн президенттикке талапкер Өмүрбек Бабанов журналисттерге маалымат жыйын өтүп жатып айтты.

Президенттикке талапкер Өмүрбек Бабанов шайлоонун алдын ала жыйынтыгы боюнча маалымат берүүдө.

Айта кетсек, 15-октябрь күнү Кыргыз Республикасынын президентин шайлоо өткөн. Алдын ала жыйынтык боюнча, бийликтин талапкери Сооронбай Жээнбеков шайлоого катышкандардын 50 пайыздан көбүнүн добушун алды. Ал эми Өмүрбек Бабанов шайлоочулардын 30 пайыздан ашыгынын добушуна ээ болгон.