ИИМ: "Таласта коомдук-саясий абал милициянын көзөмөлүндө"

Ички иштер министрлигинин бүгүн, 16-октябрь күнү саат 15:00гө карата берген маалыматы боюнча, Талас шаарында коомдук-саясий абал милициянын көзөмөлүндө.

"Талас шаарындагы борбордук аянтта, Өмүрбек Бабановдун штабынын жанында 200дөн ашык адам чогулду. Алар тарабынан азырынча эч кандай талаптар коюла элек. Коомдук тартипти милиция кызматкерлери көзөмөлдөп турушат. Тартип бузуулар катталган жок", - деп билдиришти ИИМден.

Буга чейин окурман WhatsApp аркылуу "Элдик кабарга" маалымат жөнөтүп, Талас шаарынын борборуна 400дөй адам шайлоонун жыйынтыгына нараазычылыгын билдирип чыгышканын айткан.

15-октябрь күнү Кыргыз Республикасынын президентин шайлоо өткөн. Алдын ала жыйынтык боюнча, бийликтин талапкери Сооронбай Жээнбеков шайлоого катышкандардын 50 пайыздан көбүнүн добушун алды. Ал эми Өмүрбек Бабанов шайлоочулардын 30 пайыздан ашыгынын добушуна ээ болгон.