ИИМ: "Бишкек жана Ош шаарында шайлоонун жыйынтыгына нааразы болуп, митинг өткөргөндөр жок"

Бишкек жана Ош шаарында шайлоонун жыйынтыгына нааразы болуп, митинг өткөргөндөр жок. Бул тууралуу бүгүн, 16-октябрда SUPER.KG порталына Бишкек жана Ош шаардык ички иштер башкармалыгынан билдиришти.

Ош шаарында бүгүн "шайлоонун жыйынтыгына нааразы болгондор митингге чыгышты" деген маалыматтар социалдык түйүндөр аркылуу коомчулукка чыгып, ал тургай видеолор тараган. Аталган маалыматты тактоо максатында тиешелүү тараптарга байланыштык.

Бишкек шаардык ички иштер башкармалыгы калаа аймагында митинг тууралуу маалымат түшпөгөндүгүн, учурда абал тынч экенин айтышты. Ал эми Ош шаарынын мэриясынын маалыматтык камсыздоо бөлүмүнөн да митингге чыккандар жок экенин кабарлашты.

Айта кетсек, буга чейин Талас шаарында шайлоонун жыйынтыгына нааразы болгон Өмүрбек Бабановдун миңдеген тарапташтары облустук администрациянын алдында чогулуп турганы айтылган.